Esta bilbaína foi vocalista e guitarrista da banda Onion até a disolución en 2003. Vai xa polo seu cuarto álbum en solitario e con selo propio (Winslow Lab), mais desta vez conta co apoio na distribución e promoción do sempre entusiasta Aloud Music (así que o temos dispoñible para descargar e á venda en coidados deseños en CD e vinilo). Os seus dous primeiros e máis acústicos traballos (“In The Mirror” e “Each Day A Lie”) foran producidos por Chris Eckman (dos Walkabouts) e amosábana máis íntima e melancólica. No terceiro, “Forgive me if i don´t come home to sleep tonight” apareceu a rabiosa enerxía que segue neste cuarto álbum coa produción axeitadamente austera de Paco Jiménez. O álbum reflicte tensión ao filo do arrrouto, con cambios de ritmo súpetos, que choutan da calma á violencia, nunha tormenta de agresividade roqueira e desgarrada xa desde as guitarras crúas e duras de “You gave me” e a voz en “I left”. Mais o cumio serían os ouveos e as guitarras rabuñadas da tremenda “Before Waking Up”. En consonancia cunha proposta tan persoal e austera, Ainara non só se encarga das voces e da guitarra, senón que tamén o fai da maioría dos baixos. Iso si, conta con colaboracións de Rubén Martínez de Tokyo Sex Destruction, Hannot Mintegia de Audience ou o novaiorquino Jason Victor, que acompaña a Steve Wynn cos Miracle 3 ou a Willard Grant Conspiracy. Non son cancións de fácil dixestión as de “We Once Wished”, un álbum salientable pola súa valentía, intimismo, intensidade e contención de medios. Talvez esteamos demasiado afeitos ás cousas edulcoradas, pero como comezaron PJ Harvey, Patti Smith ou Nick Cave?
Pepe Cunha 10-marzo-11.
Featured
