pancho álvarez “sonche atlántico”

Abril 27, 2012

Cando pensamos nos grandes nomes da música galega esquécensenos aqueles de quen en ciclismo chamariamos gregarios de luxo. De cando en vez, estes músicos editan traballos baixo o seu nome desde os que expór a súa creatividade musical máis persoal. Por citar dous dos máis salientables, no pop e o rock temos a Pablo Novoa, asociado a nomes como Golpes Bajos, La Marabunta, Los Ronaldos, Mastretta, Josele Santiago ou Iván Ferreiro; e no folque a Pancho Álvarez, integrante de Matto Congrío, Na Lúa ou a banda de Carlos Núñez. Se de Novoa aínda agardamos a continuación de “Novoa cruza el Atlántico”, Álvarez presenta xa o seu cuarto álbum cunha idea semellante: “Sonche atlántico”.

Como apunta o título, a liña do disco ten dous conceptos guía: a identidade do artista e o Oéano Atlántico. Pancho Álvarez toca todos os instrumentos agás as colaboracións puntuais en “Alboradas de O Porriño e Ourense” e “A Cantiga da segada de Miranda”. As influencias musicais comezan na súa Galiza natal e acompáñanse das doutras latitudes atlánticas: América, Irlanda, Bretaña, África ou Portugal. Nun impresionante traballo, coidadísimo estilistica e interpretativamente, o porriñés fai canción de cinco textos de Suso de Toro e un de Antón Reixa e, como peza instrumentais, regala tres propias, dúas tradicionais e revisa ao mestre Xosé Romero Suárez.

“Sonche atlántico” amosa a grande creatividade dun verdadeiro multiinstrumentista e a personalidade dun observador do seu mundo. A súa música é expresión da personalidade, o froito dunha amálgama de experiencias vitais, do máis cotiá ou das viaxes, do traballo ou a contemplación, da tradición e a terra ou a experimentación.

AXENDA

Facebook

22 hours ago

Ábrete de orellas
Bigott visita esta semana Galiza con "Back to Nowhere" , o seu novo disco, nervioso, directo, post punk. Xoves en Club Clavicémbalo Lugo, venres na Sala Radar, Vigo, e sábado na Sala Ruido , Ferrol.11 track album ... See MoreSee Less
Ver en Facebook