cantigas de mulleres

Decembro 17, 2012

Velaquí unha compilación que levar polo mundo adiante e coa que presumirmos das cantoras e compositoras do noso país. Como ocorre cos proxectos deste tipo, poderiamos discutir se engadirmos algunha peza máis a estas dezasete, pero do que non queda dúbida é que a selección feita por Uxía Senlle atina cun abano de propostas que van desde as máis anovadoras da tradición ás máis fieis a ela. Porén, non esquece esas artistas que tamén engaden o seu chisco de inspiración e influencia noutras latitudes, como é o caso de Sés e a súa delicada “Fala de Mel” ou “Tris Tras” de Marful. Ademais destas dúas notabilísimas pezas, atopamos as de Lobalú e Mónica de Nut, que tampouco pertencen ao catálogo de FolMúsica, artífice da edición e, loxicamente, da maioría de artistas seleccionadas.

Ademais dun agasallo desde a portada -o fermoso deseño de O Pastor sobre a idea de “Muller-Sol”-, “Cantigas de mulleres” constitúe unha testemuña da escea feminina galega, do “cantar forte e poderoso das mulleres deste país que, tamén, ten nome de muller” (Uxía comenta no libriño). Nun mesmo cedé, desde as máis veteranas María Manuela, Malvela e Señora Carmen, até a diáspora das Ialma, o anovado son antigo de Doa ou Sondeseu, a mestizaxe de Uxía, a modernidade de Mercedes Peón e Mónica de Nut, a tradición de Leilía e Susana Seivane, a xuventude de Sonia Lebedynski (Fía na Roca) e Guadi Galego … Máis valor aínda coa presenza textual da grande poetisa Rosalía de Castro nun par de pezas e un bo feixe de notables músicos do país brillando canda as protagonistas.

Como canta Ugía Pedreira na peza da súa banda Marful “mulleres valentes que ensinan os dentes”, uns dentes fermosos, sensibles e fortes.

Pepe Cunha, 17-dec-2012

Facebook