Quenquera que se interesase un chisco advertiría da cantidade inxente de poemas e versos presentes na música cantada en galego. En especial desde os albores da música pop (entendido o termo como popular, en contraposición a culta ou clásica) até a chegada da era dixital e o século actual. Este período de 1950 ao ano 2000 é o obxecto de estudio da investigación de Alberto Pombo (Loureda, 1985), licenciado en Filoloxía Galega, Doutor en Estudos Lingüísticos e Literarios e profesor no IES Rafael Dieste. Os traballos doutorais adoitan ser rigorosos e pródigos en datos, cunha bibliografía ampla, e este non se arreda desta liña.
Ora ben, esta edición para Xerais foi adaptada con toques sutís de didactismo e entretemento que fan del un libro comerciábel, deses que instrúen ao tempo que agradan. Non defrauda en absoluto o interese que esperta e proporciona información abonda para quen se está a achegar nos últimos anos ás cancións en galego. Destas, as primeiras foron inspiradas pola poesía e de aí agroma a cerna do libro: o repaso dos encontros entre a nosa literatura e as música populares desde a popularización do vinilo. Ademáis deste eixo principal hai lugar para máis que datos e citas, pois Pombo contextualiza e repasa cada momento con precisión: a resistencia e o compromiso fronte á censura, as orixes do pop en galego, diferentes movementos como Voces Ceibes, Nova Canción Galega, a música celta, o Bravú … e deseguido fai unha distribución por estilos máis ou menos homoxéneos: pop, folk, canción infantil, heavy, as orquestras …
Ao longo das máis de duascentas páxinas imos vendo cales son as poetas máis musicadas, as músicas que máis recorren á poesía, pero tamén hai oco para referirse a asuntos máis concretos pero tamén interesantes como esas artistas que se moven entre as dúas disciplinas. A música contribuíu a popularizar a nosa literatura e o pop en galego foi estimulado por textos literarios. O traballo de Alberto Pombo reivindica dun xeito exemplar este encontro frutuoso e repasa unha infinidade de propostas musicais pioneiras, populares e agochadas.
Pepe Cunha, 5-xuño-2024
