Esta banda madrileña está a dar moito que falar, e merecidamente ben, dentro dos circuitos rock. Porén, o máis meritorio é que o consiga cunha proposta de rock instrumental, da que xa falamos co seu segundo disco “II” e que segue a crecer neste terceiro. As miles de descargas e encargas acumuladas na web do seu selo Aloud Music e os bos comentarios que nos chegan de quen os viu en directo son en si mesmos a mellor tarxeta de presentación para quen non saiba de Toundra.
Para describirmos as 6 composicións habería que facer case un exercicio de erudición descriptiva pois rebordan creatividade. Cumpriría ir reflectindo en verbas as sensacións que nos transmiten e, xa que logo, caer na subxectividade máis absoluta, porque a súa música é unha fervenza de contundencia rítmica, de guitarras ora punzantes ora pesadas, sempre intensas, que de cando en vez abren paso a sutís arranxos de cordas. 40 minutos nos que van musicando emocións, estados de ánimo, ideas, soños que cadaquén interpreta ao seu xeito, polo que acae mellor recomendar a escoita que embarcarse en reflectir imaxes, ideas ou sensacións. Deixarse levar e constatar que o rock instrumental non ten por que ser aburrido.
De feito, recomendaría este disco encarecidamente a calquera afeccionad@ ao rock e, en especial, a quen queira iniciarse no rock instrumental. O selo Aloud Music e a banda poñen na rede todos os álbumes para que os escoitedes e despois caiades na tentación de mercar as coidadas edicións físicas en cedé ou vinilo verde transparente, pois a banda sempre se distinguiu polo coidado dos seus artworks. Tras o seu paso polo Resurrection Fest de 2011 en Viveiro, esperamos veñan de novo a Galiza para gozar duns directos que aínda deben prestar máis cás gravacións. Que xa é dicir !
Pepe Cunha, 5-outubro-2012
