Tiruleque

Outubro 24, 2020

nota:

– Convites: En Ataquilla.com dende o martes 20 de outubro as 09:00h.

A praza do alcalde Ramón José Souto González acolle este sábado, ás 20.30 horas, unha nova edición da Xuntanza de Gaiteiros que organiza Airiños de Fene coa colaboración do Concello. Atendendo aos protocolos para facer fronte á Covid-19, nesta ocasión o certame terá lugar baixo estritas medidas de seguridade e hixiene, con aforo limitado a 146 persoas e con reserva previa de entradas a través de Ataquilla.com. Ademais, como novidade, esta XXXII Xuntanza Airiños de Fene será a primeira que se retransmita por streaming e, aínda que nesta ocasión non haberá homenaxeado, sí contará coa actuación “dun grupo amigo e de grande calidade” como é Tiruleque.
Nesta edición de 2020 a Xuntanza de Gaiteiros de Airiños de Fene reinvéntase e ofrece a posibilidade de asistir ao encontro presencialmente ou virtualmente.

As persoas que acudan este sábado, previa reserva de entrada, á Praza do alcalde Ramón José Souto González poderán gozar da actuación ao vivo do grupo Tiruleque, presentando o seu último espectáculo “Outro que tal baila”. Dende a organización recoméndase aos/ás asistentes acceder ao espectáculo con tempo suficiente de antelación xa que a reserva de entradas perderá vixencia se non se está na fila de entrada 15 minutos antes do comezo do mesmo. A partir dese momento admitirase a entrada sen reserva, por orde de chegada e sempre que haxa aforo dispoñible. En canto ás medidas hixiénico-sanitarias implantadas, lémbrase que haberá un punto de desinfección de mans e que o uso da máscara será obrigatorio. Ademais, non se permitirá o acceso con comida, bebida ou obxectos que poidan ser considerados perigosos pola organización. Por último, o público permanecerá sentado en cadeiras individuais (non haberá para grupos de convivintes) durante todo o espectáculo no lugar que lle asigne a organización e realizará a entrada e saída de xeito ordenado seguindo as instrucións da organización.

As persoas que sigan a Xuntanza dende a casa –Facebook de Airiños de Fene- poderán presenciar o concerto de Tiruleque en directo pero, a maiores, contarán xa dende as 20.00 horas con contidos adicionais (vídeos) nos que se fará un percorrido dende o inicio das xuntanzas ata o día de hoxe, lembrando a todos/as os/as homenaxeados/as e participantes de ditas xuntanzas. Tamén se anunciará a través desta vía “aos homenaxeados do ano que ven no que si todo acompaña recuperaremos o formato completo de anos anteriores”. E xa por último, poderán gozar dunha pequena mostra do proxecto no que Airiños de Fene está inmerso na actualidade coa súa sección Setestrelo, un espectáculo músical, visual e teatral dos diversos camiños de Santiago.
Dende o ano 1989 Airiños de Fene organiza a Xuntanza de Gaiteiros coma “un acto para dar a coñecer a nosa música tradicional pero tamén para o intecambio de ideas e proxectos que axuden a potenciar tanto a música tradicional como o noso idioma e as nosas tradicións. Tradicionalmente Airiños de Fene aproveitou a celebración deste encontro anual “para homenaxear a algúnha persoa, grupo ou entidade que se caracterizara por gardar, recoller, recuperar, aprender e dar a coñecer tanto o baile como o canto e a nosa música tradicional”. Aínda que nesta XXXII Xuntanza de Gaiteiros non haberá nin persoa nin grupo homenaxeado, a banda fenesa convidou a participar a un grupo amigo e de grande calidade” como é Tiruleque.

TIRULEQUE

Tiruleque naceu como banda en 2002, ano no que se reuniron cinco rapaces procedentes da música tradicional e cunhas inquedanzas musicais compartidas. A partir de entón, o proxecto musical iniciouse como quinteto tradicional que mesturou as fontes da tradición da música galega – tanto a través de recollidas como recorrendo aos cancioneiros- con outras moitas influencias e procurando unha evolución que ao longo dos anos empurrou ao grupo a incorporar distintos instrumentos cos que levar máis alá esa tradición. Dese xeito, o grupo conseguiu acadar maior expresión, maiores posibilidades e un son propio que se plasma nos discos autoproducidos Tiruleque (2009), Mu!! (2013) e agora Outro que tal baila (2018).

Co seu repertorio, actuaron nos principais festivais de música tradicional e folk de Galicia. TIRULEQUE leva percorrido a xeografía galega e estatal, deixando constancia da calidade dos seus directos coa participación en festivais de recoñecido prestixio, como o Festival do Mundo Celta de Ortigueira, Pardiñas ou Beltaine -Avilés Intercélticu. A nivel internacional participou representando a Galicia no 41º e 49º Festival Intercéltico de Lorient. Tamén ten compartido escenario con artistas da talla de Milladoiro, Leilía, Xosé Manuel Budiño, Susana Seivane, Uxía, Treixadura, Ardentía, Quempallou, A Roda ou Kepa Junkera, entre outros.

Na actualidade, o grupo está composto por Antón Bueno (contrabaixo), Álex Fente (acordeón), Luis García (bombo con pratos, percusións e coros), Miguel Horjales (caixa, percusión, coros), Serxo Núñez (clarinete, gaita, percusións, voz), Fernando Román (Saxo, trompeta, ukelele) e José A. Vázquez, (Gaita, saxo, percusións).

AXENDA

Facebook

54 minutes ago

Ábrete de orellas
TANXUGUEIRAS e Fillas De Cassandra unidas en "Quen é a que canta?" ... See MoreSee Less
Ver en Facebook
20:30 h.
Praza Alcalde José Souto González, Fene.
De balde con reserva..