Os traballos de Luis González (Los Visionarios, Caballero Reynaldo …) xa son habituais en Ábrete de Orellas e hai pouco comentei “País tropical”, álbum a dúo cun músico co que colabora desde hai anos: Manu Vicente. En troques, agora o dúo é cunha artista que seica non coñecía persoalmente: Irene Villar Tiemersma (Tiemersma, El Futuro Peatón).
Presentan un pop-rock desenfadado (véase a portada), aberto a influencias clásicas e, por citar unha das de González, o barroquismo duns XTC regado cun chisco de macarrismo ou irreverencia. A sonoridade da proposta, a actitude libre e independente e a voz de Irene en “Te llamo mañana” trouxéronme á mente o proxecto de Anni B. Sweet & Los Estanques. Ambos os dous son proxectos elaborados a dúo polas artistas implicadas, non un fulanito-acompaña-a-menganita ou menganita-pon-voz-ás-cancións-de-menganito.
“Primera comunión” abre unha serie de colaboracións en formato de EP de tres cancións que verán a luz cada tres meses en edición limitada de 100 unidades en CD de cartón simple.
Pepe Cunha, 1-setembro-2023
podes escoitalo no bandcamp de Hall of Fame
Repertorio
Te llamo mañana
Vamos a vivir juntos
Pepo, el semiparalítico
