Cantas bandas pagarían por ter creado cancións tan redondas en melodías e letras como “Lola”, “Sunny Afternoon”, Till the End of the Day” ou “Dedicated Follower of Fashion”? Pois estes títulos non aparecían en “The Journey Part 1”, comentada aquí mesmo hai un meses, o que vén confirmar que o de Part 2 non significa un chanzo menor en popularidade ou calidade nas seleccións. Estas compilacións que celebran os 60 anos do nacemento de The Kinks distínguense por conxugar clásicos recoñecíbeis por un público algo formado e xemas máis ou menos agochadas, así como algunha peza inédita. O paso das décadas e a cantidade de reedicións só revalorizaron aínda máis a produción e os arquivos dunha banda imprescindíbel para quen amamos o pop con maiúsculas.
Os diferentes formatos das edicións físicas ofrecen amplos libretos con fotografías da banda e apuntamentos de cada canción a cargo do compositor principal Sir Ray Davies, o seu irmán Dave e Mick Avory. Estes membros vivos do cuarteto orixinal volven encargarse de seleccionar as mellores remasterizacións de singles populares como os mencionados ao principio, caras B, cancións de álbums que son xemas reivindicadas por Kinkmaníacos como “This Time Tomorrow”, “Where Are They Now” .. e seis mesturas novas por Ray Davies, das cales tres pezas corresponden a un concerto no New Victoria Theatre de Londres en 1975: “Everybody’s a Star”, “Slum Kids” e “(A) Face in the Crowd”.
Con estas 34 cortes e os 36 de “The Journey Part.1″ poderiamos falar dun moi bo arquivo da produción de The Kinks, dun repaso consistente ás diferentes facianas destes titáns até o 1975: eses primeiros singles asociados a un riff ben característico, os álbums que os fixeron trascender ao olimpo do pop (“Face to Face”, “Something Else …”, “Village Green Preservation Society“, “Muswell Hillbillies” …) e os polémicos ou ambiciosos “Everybody’s in Show-Biz”, “Preservation Act 1 and Act 2”, “Soap Opera” e “Schoolboys in Disgrace”. Neste últimos e na etapa posterior sempre atopamos xoias do cancioneiro de Ray Davies, mais Dave tamén está presente con “Creeping Jane”, “Susannah’s Still Alive” ou “Lincoln County”. Deixo no ar a pregunta: haberá mergullo na etapa estadounidense ou de estadios co selo Arista ?
Pepe Cunha, 3-decembro-2023
