Talabarte

Xullo 10, 2014

ciclo Atardeceres no Gaiás

Talabarte

Tres músicos experimentados e de sobra coñecidos da nosa escea editan o primeiro álbum dunha colaboración que levaba anos curtíndose en ensaios e tamén diante de público. Os renovados folgos do selo Do Fol fan que hoxe vexamos editada a fusión instrumental do contrabaixo de Kin García (da banda de Susana Seivane), o violín, viola e nickelharpa de Quin Farinha (Berrogüetto, Aló Django!) e o acordeón e acordeón diatónico de Pedro Pascual (Marful). Sen dúbida un super trío de virtuosos da música galega e un traballo ben macerado, pois foi producido entre setembro de 2008 e febrero de 2011. Ademais, preséntanse con abonda minutaxe (70 minutos para 13 pezas) que @s menos afeccionad@s deben dosificar para non sentirse abafados ante tanta información musical.

Talabarte é unha proposta totalmente acústica de música tradicional contemporánea na que escoitamos folk, jazz, tango, valse (fermoso o “Vísteme amodo que teño presa”) ou pezas como “Arbore-struga”, construída con xotis romanés e macedonio. Música imaxinativa, virtuosa, elegante e que tamén incita ao baile. Reinterpretan e reinventan con imaxinación pezas tradicionais galegas como “Tres golpes”, “Sara”, “Santiagreb” ou “O garotinho de Nebra” e repasan dúas pezas de Bruno LeTron. Non faltan composicións propias como a asinada polos tres (“Fendendo Achas”), dúas de Quim e unha de Pedro Pascual. En canto ao continente físico, contan con ben acaída fotografía e o deseño gráfico de Pastor.

Talabarte é unha proba máis de que seguen a saír ricos froitos máis ou menos cercanos á Central Folque e Compostela como canteira ou centro de confluencia de músicos do país.

Pepe Cunha 12-xullo-2011

21:00 h.
Cidade da Cultura, Monte Gaiás, Santiago de Compostela.
De balde.