silvia quesada “la pena abierta”

Febreiro 24, 2014

Estreei o disco nunha tarde recollida e quedei gratamente atrapado. Como adoito non quedar coa primeira impresión, para ben ou para mal, a seguinte escoita procurei que non fose en circunstancias tan favorecedoras. Confirmeino, seguía rendéndome á calidez do debut de seu desta asturiana que pon a voz na última formación dos Tejedor, Antes da banda senlleira do folque asturiano, Silvia pasara por bandas coma Los Gatos del Fornu o Blima. Sempre máis próxima ao circuito folque.

“La pena abierta” é unha colección de 10 cancións de corte pop-folk que duran o necesario, deixando fóra calquera exceso que distraia o miolo da cuestión: unha estrutura ben construida e unha interpretación que acolle a quen se deixe aloumiñar por ela. Cancións coma “Antes d”empezar”, “21”, “Les palabres”, “Les coses qu”hai qu” aprender” ou a case-rancheira “De llonxe, gano” son pílulas de 3 minutos preparadas a base dunha voz doce, unha melodía clara, instrumentión austera ou precisa (con algunhas achegas puntuais e valiosas entre as que non faltan Javi e José Tejedor) e uns textos que falan de sentimentos universais: resignación, esperanza, decepción, melancolía …

Aquí rendémonos á humildade e a sinxeleza ben entendidas, sen pretensións desmedidas por impresionar. O protagonismo recae nun labor feito con agarimo e cocido a lume lento arredor da interpretación da vocalista. Servidor necesita de vez en cando o refuxio de discos coma este, así que descubrilos e compartilos resulta un pracer.

Edita Algamar Producciones, S.L. coa produción de Sergio Rodríguez e Alfredo González, autor de varias das canciones xunto con Javier Vallina.

Pepe Cunha, 24-febreiro-2014

AXENDA

Facebook