nota:
SES tamén visitará Vilagarcía na súa xira de presentación do seu quinto traballo, ‘Readmirando a condición’, no que a cantora coruñesa volveu gravar, musicar e arranxar o seu primeiro disco, ‘Admirando a condición’, que publicara en 2011. As entradas para o concerto da capital arousá -que terá lugar o sábado 7 de abril ás 21 horas- xa están á venda en ticketea.com.
O espectáculo forma parte da xira que a está a levar por outras cidades galegas (A Coruña, Vigo, Santiago, Narón e Lugo), ademais de Barcelona, Madrid, Bilbao e Lizarra. Neste ‘tour’ as súas fans poden escoitar por primeira vez o repertorio íntegro deste disco, pois naquel momento non se fixo xira e algúns dos temas que inclúe -como “Rolling Stone”, “Pepa” ou “Fala de mel”- apenas foron interpretados en directo. Este novo CD inclúe ademais un tema inédito -e homónimo- que xa podedes escoitar neste videoclip en Youtube, que xa acadou máis de 12.000 visitas.
Esta revisión do seu primeiro disco chega logo do éxito de ‘Opoñerse á extinción’, do que vendeu máis de 7.000 discos (chegou ao top 85 de vendas en España) e de ofrecer uns 50 concertos desde a súa presentación en decembro de 2016, con ‘sold-outs’ en case todos os auditorios galegos e concertos nas principais salas de Bilbao, Madrid ou Barcelona, alén de participar no Madrid World Pride e noutros moitos festivais por toda a Península.
‘Readmirando a condición’ está composto por doce temas, dos cales once corresponden ao seu primeiro álbum, que contiña éxitos como “Tempestades de sal” ou “Non son fada”. Desta volta, a cantora dálle un son máis “SES” ao seu disco de debut, convertendo aqueles temas nun son -en moitos casos- totalmente diferente, cunha sonoridade máis potente. Estas once cancións foron gravadas desde cero e producidas e arranxadas por ela mesma mesma, a diferenza do primeiro disco.
***Este novo disco só se vende nos concertos da banda e na súa web.
