nota:
Dúas arpas e un contrabaixo, elementos electrónicos e percusións acústicas unidas ao canto e a ocarina –na que Romaní ten demostrado unha especial capacidade de interpretación– dan son a este novo traballo discográfico. Foi concibido para recrear un xogo sónico de luces e sombras, de penumbras estilísticas, de discursos entreverados con alusións a músicas de diversas orixes nas que a tradición oral popular vertebra un produto inconfundiblemente galego.
En formato trío –a Rodrigo acompáñano as intérpretes Bea Martínez e Xulia Feixoo– o concerto promete un directo de calidade ao que o arpista e fundador de Milladoiro xa ten acostumado ao público.
