O debut deste mugardés de só 23 anos exemplifica a importancia de que un material caia en mans boas e expertas para aquaelar unha idea ou proxecto. Pablo Leira marchou adolescente co seu pai aos EUA e volveu cunha formación notábel á guitarra: título en interpretación no Berklee College of Music (Boston), unha bolsa e premios como o John LaPorta (2019) ou o Jimi Hendrix (2020). Ademais do grado en guitar performance, na volta trouxo un feixe de cancións que decidiu gravar na casa mentres se unía a bandas roqueiras como a de Andrés Balado ou Los Eternos.
Nestas nove composicións propias resúmenos algunhas das experiencias por aqueles lares en cadanseus dous-tres minutos e nun bo inglés (nunca está de máis dicilo). Chegaron en gravación precaria aos RRStudios (Ferrol) e alí estimaron que pagaba a pena darlles unha volta e sumar achegas de músicos da comarca: o grande Álvaro Lamas á steel guitar, Pepe Coira (harmónica), Rafa Pereira (baixo) e Cabe García (guitarra e banjo). Deste xeito, o que podería quedar nunha maqueta prometedora converteuse nunha colección breve pero intensa de “americana”, esa etiqueta onde caben correntes varias de música norteamericana de raíz. Tira máis polo repousado, acústico e intimista con toque folk en “On My Mind”, “I Rely on U” ou “Upon Reflection” mentres que en “2’s”, “Honey You’re Gonna Lose” ou “I Have Seen U” solta un chisco esa contención. No medio fai sitio para un instrumental breve e algo experimental: “Cosmic Cowboys”.
Se gostas dos Dylan, The Band, The Byrds, os Wilco menos experimentais … de seguro apreciarás a valía dun debut que nos fai ser optimistas polo que Pablo Leira nos poida seguir a compartir. Como intérprete poucas dúbidas podemos ter, pero para o de compoñer cómpre desexarlle traballo, experiencia(s) e inspiración.
Pepe Cunha, 30-marzo-2023
https://ferror.bandcamp.com/album/dirt-wood-grass
1. I’m Gonna Leave Her Behind
2. I Have Seen U
3. Upon Reflection
4. 2’s
5. Cozmic Cowboys
6. (You’ve Been) On My Mind
7. I Rely On U
8. Beneath The Blue
9. Honey, You’re Gonna Lose
