Afortunadamente, non todo na vida son cartos, e iso tamén se pode aplicar ao mundo dos festivais, como se vén de demostrar unha vez máis co Felipop. Esa conxunción de bo gusto, trato familiar, actitude postitiva ( natural, non de postal), imaxinación e prezos módicos, fai desta cita un mundo no que dá gusto perderse. Esta mestura de verbena e música pop que propón a asociación Felicia é un sopro de ar fresco no cada vez máis masificado mundo dos festivais musicais. Un non necesita estar moi versado en tendencias ou nomes de formacións pop para desfrutar do que se agacha baixo a a carpa da pista polideportiva. O mesmo que no tradicional patrón das nosas vilas, un pode achegarse no mediodía do sábado a unha sesión vermú onde degusta productos da terra mentres desde o escenario brota música. A diferencia esencial é que no Felipop non actúan orquestras, senón intérpretes pop. Nun atardecer soleado, a sorpresa foi inesquecible: un histórico do pop español como Adolfo (Íberos e Cánovas, Rodrigo, Adolfo y Guzmán) deleitándonos coa súa marabillosa voz: “Señora azul”, “Summertime girl”… mentres comiamos empanada e mexillóns. E toda unha figura da radio española como Juan de Pablos entre os asistentes, constatando que a oferta goza de simpatía alén do Telón de Grelos.
Mais non é xusto quedar só co que pode parecer máis anecdótico. A pesar do orzamento que manexa a organización, alí disfrutamos de máis luxos musicais: un compositor e intérprete histórico e exquisito coma P.F. Sloan e un excelente trío londinense que incluso o acompañou na noite do venres, os Bronco Bullfrog. Ademais non podemos dicir que a representación peninsular non estivese á altura, pois aínda que un persoalmente disfrutou moito dos Protones, Leslie Nielsen e os Gurús, bandas coma Cinemascope, Contrastes, Easytones e Cosecha Roja tamén cumpriron.
Agora a agardar pola vindeira edición. Este ano fomos uns varios e cómodos centos e supoño que os demais asistentes estarán comigo en que o importante é manter o bo espíritu do festival. No musical un xa confía cegamente na organización.
Pepe Cunha 15-ago-2001
(revisado gramaticalmente en 2013)
