Mekánika Rolling Band gaña o Cantalingua 2023 e As Monchas e Cuarta Xusta obteñen a segunda e terceira prazas

Abril 13, 2023

nota:

Mekánika Rolling Band, As Monchas e Cuarta Xusta son as bandas gañadoras da edición do Cantalingua desta convocatoria de 2023 e serán as bandas que participarán nas Festas convocadas en espazos públicos e centros escolares das catro provincias e que se celebrarán ao longo do vindeiro mes de maio. Como xa ocorreu no pasado 2022, o xurado escolleu a Mekánika Rolling Band como grupo gañador. O segundo lugar foi para o dúo punkInfantil As Monchas e o terceiro premio foi para a banda Cuarta Xusta, que ten concorrido tamén en anteriores celebracións de Cantalingua. Na actual edición do Cantalingua participaron un total de 35 bandas e solistas con músicas de todos os estilos cantando en galego.

Mekánika Rolling Band gañou coa canción “Maruxaina”. A Mekánika Rolling Band é un grupo de animación de rúa, que conta cun escenario móvil autoamplificado, e que incorpora efectos visuais de lume e pirotecnia a parte dun show enérxico, participativo e dinámico. No formato de escenario o show tamén inclúe efectos de lume e pirotecnia. Conta cunha traxectoria de 15 anos, nos que xiraron por toda a península e parte de Europa, exportando a música galega pola Península e a países como Alemania, Austria, Francia e Italia. A banda está formada por Nolo Chazo a Batería, Pepe Noya ó baixo, José Hermo a guitarra, Martín Chenlo ó trombon, Adrián Trillo ó saxo alto, Daniel Vieito ó saxo tenor e voces e Aitor Garcia ó keytar e voces. No ano 2017, foron semifinalistas no Concurso GOT TALENT SHOW de Telecinco. Dende hai 5 anos, lideran o Ranking da plataforma Orquestas de Galicia facendo unha media de 90 concertos por temporada.

As Monchas. Da suma dun músico punk e un músico infantil nace este dúo que considera que non hai nada máis punk ca unha nena. Peter Punk e Brais das Hortas fan punk para peques. A canción coa que obtiveron o segundo lugar no Cantalingua foi “O oso do Caurel”.

Cuarta Xusta. “Globalización” é o título da canción coa que Cuarta Xusta obtivo o terceiro lugar no Cantalingua 2023. A banda está formada por Lúa Aguete Naveira -Batería, Laura Romero- Baixo, Alberto García (Friufe) – Guitarra e voz, Marta María Sánchez Villarabide- Violín, guitarra e voz, Aida López Costa- Voz principal. Cuarta Xusta nace en Melide en xaneiro de 2016, grazas ao Presumo de galego (festival organizado no Pub Gatos a través do IES de Melide) , o nome debese a un intervalo musical xa que nun principio eran catro integrantes.

Podedes escoitar na seguinte ligazón as tres cancións gañadoras desta edición e o resto das pezas presentadas a esta convocatoria do Cantalingua: Todas as cancións do Cantalingua 23

Estas son as datas e localidades de celebración das Festas do Correlingua durante o mes de Maio 23

xoves 4 Vigo
luns 8 A Coruña
martes 9 Ponteareas
mércores 10 Ourense
xoves 11 Lugo
luns 15 A Mariña
luns 22 Monforte
martes 23 Ferrol
mércores 24 Pontevedra
xoves 25 Moaña
venres 26 Compostela
mércores 31 A Estrada

Outras actividades do Correlingua 2023

Regueifando!

Faremos unha gran regueifa colectiva.

Enviamos un titorial, crean e gravan 3 coplas na aula e mándase ao seguinte centro para que o continue. Ao final editamos un vídeo con todas as regueifas dos grupos participantes. Na edición do 2022 participaron 27 grupos doutros tantos centros de ensino de toda Galiza. Está actividade xa está en marcha en diversos centros de Galicia.

Desata a lingua.

Obradoiros de escrita creativa impartidos por escritoras en aulas de 1º e 2º da ESO

Desde hai xa dúas edicións comezamos con estes obradoiros coa intención de elaborar un manifesto colectivo. O manifesto desta edición é o resultado dese traballo feito nos centros no último trimestre do 2022. Os obradoiros que se fan no 2023 darán como resultado o manifesto do Correlingua 2024

Crealingua:

Concurso libre de creación artística en galego.

O Crealingua é unha ventá aberta ao idioma, agardamos o aire fresco en forma de Banda Deseñada, Tik Tok, vídeo, blog e toda aquela produción feita polo alumnado. Data límite para o envío do material: 15 de abril

O premio será unha clase maxistral cun/ha profesional do ámbito no que participe o grupo gañador.

Manifesto Correlingua 2023

NA CASA, NA ESCOLA, BOTA A LINGUA FÓRA

Podemos parecerche xente pequena, pero somos o futuro! Somos xente lista! Xente intelixente! E hoxe viñemos aquí a botar a lingua fóra! Porque a lingua que sacamos é a nosa: O GALEGO! Así que neste 2023 NA CASA, NA ESCOLA, BOTA A LINGUA FÓRA.

Queremos botar a lingua fóra diante de vós, as nosas familias, e pedirvos que vós tamén o fagades. Faládenos en galego, axudádenos a falalo, practicade con nós. Familias, ensinade a lingua e vide berrar ben alto: NA CASA, NA ESCOLA, BOTA A LINGUA FÓRA.

Amamos o galego da mesma maneira que amamos todas a linguas e a súa riqueza, porque sabemos que cada lingua importa! NA CASA, NA ESCOLA, BOTA A LINGUA FÓRA.

Botamos a lingua fóra diante das nosas mestras e dos nosos mestres. Para que se vexa que queremos unha escola que respecte e defenda de verdade o galego. Por iso berramos: NA CASA, NA ESCOLA, BOTA A LINGUA FÓRA.

Botamos a lingua para que se escriban máis páxinas en galego, que haxa en todas as teles presenza do galego, que nas radios se poña música en galego. Por iso hoxe berramos NA CASA, NA ESCOLA, BOTA A LINGUA FÓRA.

Botamos a lingua fóra para que a literatura galega chegue aos medios, ás librerías e bibliotecas. Para que as redes en galego medren e nos cheguen. Para que a arte creada en galego saia por todo o mundo. Por iso berramos: NA CASA, NA ESCOLA, BOTA A LINGUA FÓRA.

Botamos a lingua fóra diante das institutións que teñen que defender o galego. Queremos vela nos documentos oficiais, no médico, nas tendas, nos medios, nos libros, nos videos, nas aplicacións…. Por iso berramos NA CASA, NA ESCOLA, BOTA A LINGUA FÓRA.

Hoxe podemos facelo e imos facelo: NA CASA, NA ESCOLA, BOTA A LINGUA FÓRA. NA CASA, NA ESCOLA, BOTA A LINGUA FÓRA. NA CASA, NA ESCOLA, BOTA A LINGUA FÓRA.

Este manifesto é o resultado dos obradoiros Desata a lingua celebrados no 2022 no que participaron alumnas e alumnos do IES Rosalía de Castro (Santiago de Compostela), IES da Guía (Vigo), IES Chano Piñeiro (Forcarei), IES María Soliño (Cangas), IES Parga Pondal (Carballo), IES Ánxel Fole (Lugo), IES Fontem Albei (A Fonsagrada), IES de Xove (Xove). Os obradoiros foron impartidos polas escritoras María Lado, Ana Carreira e Lucía Aldao.

Máis info:

AXENDA