O xeito máis rápido de presentar as Malvela sería mencionar ese seu hit “O Pirimpimpín” que soa na exitosa serie de televisión “Padre Casares”. Esta formación de voces femininas de diferentes xeracións (dos 86 anos da señora Carmen aos 32 de Raquel Domínguez) naceu dun curso de cantos populares que Uxía Senlle impartiu na súa Sanguiñeda natal. Desde entón, Malvela foron conquistando os ouvidos e corazóns de quen escoitamos algunha peza dos seus tres álbumes e, sobre todo, de quen as viu en concerto. Por isto chegaba o momento de rexistrar ese poder que transmiten ao vivo e tiña que ser a propia Uxía quen se encargase de coidar a produción musical desta gravación realizada no Multiusos de Mos, practicamente na casa. O título de “Raianas” responde á presenza principal dun repertorio raiano que reflicte a querencia dos artistas implicados nos vínculos culturais entre Galiza, especialmente eses cantos vellos da comarca de Mos-Porriño, e o norte de Portugal. Ademais da banda de acompañamento con Sergio Tannus e Gustavo Domínguez á fronte, as colaboracións de Uxía Senlle e a súa irmá Ana, motor da dirección vocal, Nuria Freiría e Oli Xiráldez e Carlos Blanco e a poeta María Magdalena cs seus textos e lecturas. As Malvela son un dos tesouros da nosa música popular, contan coa axuda e a admiración de estupendos músicos ( aquí Magín Blanco regállales a peza “Pola rúa de San Pedro” ) e no directo transmiten maxia. Como este disco é un documento de todo isto, antóllasenos un agasallo ideal para toda a familia, e mais co fermoso deseño gráfico e a maquetación d’O Pastor. De novo se apunta o tanto a discográfica Do Fol.
Pepe Cunha, 7-nov-2011
Featured
