As letras e a voz de Iseo Agilda, a quen coñeciamos por Blues do País e Sacha na Horta, son as protagonistas dunha nova proposta chamada Mäi. Porén, e malia ser un proxecto moi persoal, podemos dicir que Iseo é unha das tres patas dun tallo que completan o produtor Tomás Ageitos e a cellista Margarida Mariño. Só así se entende un nobelo sonoro complexo onde enredan conceptos como urbano e electrónica con tradicional e orgánico.
O cello de Mariño xa está máis que afeito a xogar coa electrónica e o habitualmente produtor Ageitos implícase máis en arranxos e instrumentación, resultando moi salientábel o seu traballo sobre as percusións tradicionais. Nestas atmosferas, a cálida voz de Iseo encontra un acomodo perfecto nunhas cancións onde tamén atopamos un par de colaboracións notábeis: as voces de Yolanda Pose (Pura Mesura) rapeando en “Cando volvan as mareas”, un dos hits potenciais do disco, e os oud e bouzouki de Fernando Barroso na místico-oriental “Inshallah”. Sumen a xoia de pop bailábel “Big Bang” para ir entrando no disco e xa se poden deixar atrapar polas demais pezas que xogan a expresar melancolía, amor, luz e emocións varias.
En “Nigredo” atopamos unha amálgama elegante de atmosferas de emoción que soan a folk e a electrónica, a artificial e a auténtico cun coidado exquisito; un agarimo que non se limita ao sonoro, pois tamén ese gusto expándese os vídeos e á presentación física. Esta amósase nun formato curioso orixinal tamén: trátase dun despregábel que contén -ou non- o disco en sobre de cartón e o libreto e dentro atopamos un código QR para escoitar e descargar. Xa que logo, e sen renunciar a arte gráfica, pódese adquirir con ou sen o CD.
álbum en Spotify
repertorio
1 – Son verdor
2 – Altair
3 – Serpe de son
4 – Cando volvan as baleas
5 – Templo escuro
6 – Big bang
7 – +
8 – Inshallah
