Lucinda Williams non defraudou no Galicia Importa, 11-xuño-2013

Xuño 13, 2013

Comentábase que esta cita coa veterana songwriter estadounidense podería non ser para tanto porque viña sen banda. Con isto da estafa (ou crise se usamos a denominación máis aceptada) temos oportunidade de ver grandes nomes ao vivo aínda que sexa nun formato acústico ou, como neste caso, de escasa instrumentación. Redúcense notablemente os gastos dos concertos e así poden ser asumidos e propostos ás institucións polas promotoras. Asemade, aumenta a oferta de xiras porque os músicos necesitan tocar, neste caso máis veces por menor un menor caché. En definitiva, que o público ten que elixir onde “inviste” os seus cartos para lecer e calquera comentario ou mala coincidencia pode prexudicar a resposta a un concerto. Afortunadamente, unhas cincocentas persoas apostamos por este plan para unha noite de martes e saímos satisfeitos.

O prezo da entrada non era baixo e algún medio falaba de que a Williams “só” viña acompañada polo soberbio guitarrista Doug Pettibone. Non foi así, pois tamén trouxeron o bo apoio ao baixo de David Sutton, que contribuiu a que o son do concerto tivese aínda máis corpo e calidez do que xa se supuña na voz e guitarras. Por se fose pouco, tamén a iluminación e o público, na súa inmensa maioría de mediana idade, estiveron impecables.

Nalgo máis de hora e media, Williams cantou co sentimento que xa transmite nas súas gravacións. Deu un bo repaso destas con até seis paradas no seu marabilloso “Car Wheels on a Gravel Road” de 1998. Os álbumes “Essence” e “World Without Tears” tamén estiveron ben representados e non faltaron dous temas do futuro álbum máis unha notable, e ben acaída para estes temos de “depresion/recesion”, versión do bluesman clásico Skip James. Coma primeiro bis e solictada desde o público, “West” foi talvez a máis emocionante dun concerto sen fenda ningunha. Tamén lembrou as versións de Betty Everett e Lila Downs cando presentou “Joy” e “I Envy the Wind”.

Non quedaron dúbidas, por Compostela pasou unha grande que se despediu agradecida a unha “inspirational audience”: “Peace and Love. Power to the people”…. e cancións de Lucinda Williams para sandar as feridas !

Pepe Cunha, 13-maio-2013

lista de cancións (contrastada coa info do noso colega Xavier Valiño) :

Can”t Let Go
People Talkin”
Pineola
Jackson
Greenville
I Look At the World (nova)
I Envy the Wind
Drunken Angel
Something Wicked This Way Comes (nova)
Born to Be Loved
I Lost It
Hard Time Killing Floor Blues (versión de Skip James)
Real Live Bleeding Fingers and Broken Guitar Strings
Essence
Changed the Locks
Joy
Honey Bee

bises:

West
Blessed
Ventura
Get Right With God

lista en Spotify e fotos:

Facebook

3 hours ago

Ábrete de orellas
En galego, con independencia e citando fontes e referencias. Estas serían as premisas que sigo desde que me puxen ao outro lado dun micro. Non falo (ben) dalgo porque me paguen ou acrediten nin publico para monetizar. Non vivo disto. Dígoo pq xa mo preguntaron.Fdo: O director orelludo ... See MoreSee Less
Ver en Facebook