Leo Bassi trae de xira a Galicia a súa “Gran Misa Patólica”

Abril 21, 2015

nota:

O bufón italiano Leo Bassi regresa a Galicia coa misión de evanxelizar dende o humor e a crítica coa súa Iglesia Patólica. Deste xeito, o bufón visitará Ourense, Santiago e As Pontes coa súa Gran Misa Patólica, un espectáculo que realmente marca un fito na carreira de Bassi, porque máis ca unha obra de teatro, é unha verdadeira “misa bufonesca” da famosa Iglesia Patólica, culto de humor, ironía e crítica fundada polo ilustre pallaso en 2012 no barrio de Lavapiés de Madrid. En Galicia, agora estreará esta montaxe inédita, para espallar “a súa fe e devoción” no redentor: un pato de goma. Con este espectáculo, Leo Bassi visitará Ourense o xoves 23 de abril dentro da programación do Miteu (onde tamén ofrecerá unha masterclass), achegarase ás Pontes o venres 24 para representar a súa peza no Cine Alovi ás 21 horas e culminará o seu periplo o sábado 25 no Paraninfo da Universidade de Santiago de Compostela (Facultade de Xeografía e Historia, Praza de Mazarelos) cunha dobre función (ás 18.00 horas e ás 21.00 horas).
No caso das funcións de Compostela, as entradas custan 10 euros a xeral e 7, os membros acreditados da USC e desempregados. Para adquirilas, cómpre realizar as reservas a través do teléfono 981582836 ou enviando un correo a info@pallasosenrebeldia.org. Con cada entrada, o espectador estará a contribuír no financiamento do Festiclown Palestina 2016. No caso das Pontes, as entradas custarán 10 euros e tamén irán por reserva telefónica, a realizar dende o xoves 16 até o xoves 23 de abril chamando de 9 a 14h ao teléfono 981440344.
MISA PATÓLICA
El culto patólico comezou o seu periplo o 28 de decembro de 2012. Ese día abría un centro de culto chamado El Paticano de Lavapiés, dedicado á adoración dun pato de goma amarelo que se converteu no mesías. Alí celébranse regularmente misas e acontecementos como vodas e bautizos coa súa propia liturxia.
O máis singular é que o que comezou como unha travesura orixinal e divertida converteuse xa en algo que transcende a sátira, poñendo en evidencia as contradicións entre a narrativa oficial da nosa sociedade e os valores da xente que a vive. A raíz de toda esta travesura nace este espectáculo que en Galicia se verá por vez primeira.
O gran bufón Leo Bassi, ademais de ofrecer as misas na súa santa sede, tamén emprende viaxes evanxélicas por todo o orbe, como o que agora o trae a Galicia, para provocar gargalladas e aplausos de consensos con preguntas e reflexións básicas sobre a liberdade de expresión, a ciencia, a tecnoloxía e a relixión.
Non obstante, a Gran Misa Patólica non se limita só a ser un contedor irónico para ordenar os argumentos laicos clásicos. A raíz dos seus propios enfrontamentos cos defensores intolerantes da relixión, Bassi chegou a unha conclusión fundamental: O riso é sagrado e a arte do pallaso ten unha función que conecta coa esencia do ser humano.

Facebook

10 hours ago

Ábrete de orellas
Un dos temas favoritos do último álbum de Ataque Escampe.Tremendo Audiovisual ... See MoreSee Less
Ver en Facebook