Chega de Valencia co título de “artista emerxente” para a audiencia do programa veterán de Radio 3 Disco Grande. O selo radicado en Galiza Ernie Producciones aposta por un debut ambicioso, pois nel atopamos músicos pertencentes a bandas recoñecidas do panorama alternativo español (Havalina, The Sunday Drivers, Tulsa, We Are Standard, Nudozurdo …) e liderados pola produción de Julio de La Rosa. Encaixa de inmediato na tendencia-moda das vocalistas femininas de fraxilidade aparente e cantando en inglés, polo que gozará de certa atención mediática xunto co risco de quedar eclipsada por esas Russian Red, Anni B. Sweet, Alondra Bentley … cada unha coas súas caracteríticas propias, claro. Ademais das mencionadas, veñen á mente unhas CocoRosie, Alanis Morissette, The Sundays, Marianne Faithfull, Cat Power…
Malia amosar unha dicción con tendencia á ampulosidade ou a sobreactuación, non andan en absoluto faltas de encanto estas 10 cancións coa súa carga de melancolía ou contención rabiosa, segundo a vivencia ou historia que as inspira: relacións, despedidas, encontros … Trátase dun pop-folk de melodías efectivas, tanto espidas (a proba nos vídeos subidos a Youtube) como pasadas ao estudio. Escoitado o resultado, un Julio de La Rosa en estado de graza (Goya á banda sonora por “La Isla Mínima”) amosa bo gusto para vestilas de ornamentos instrumentais ben acaídos de piano, cordas ou percusión.
“To the Sky”, “Perhaps” ou “Trafalgar” son pop luminoso, pílulas efectivas de 3 minutiños; “Stay Away”, “Hopeless” ou ”Goodbye to You” móvense na melancolía, languidez e deixan un sabor agridoce; “Holy Sacrament” e “La maga” poñen o ton máis intimista, contido ou reflexivo … En definitiva, que aquí se abre un camiño e o tempo dirá que pasará coa Helena Sanchis-Guarner vocalista-compositora (tamén é actriz). Veremos se consolida un selo propio, se trascende e “sobrevive” no bosque dunha moda, pero este debut é realmente notable.
Pepe Cunha, 17-marzo-2015
