familia caamagno “hai que andar cos tempos”

Abril 02, 2014

Ás veces os créditos dun disco non traen sorpresas e iso pode ser bo sinal. Este quinteto que chega de Sigüeiro practica a parte máis directa e lúdica do pop e rock dos 50 e 60 e o seu debut en formato físico tiña que ser producido por Jorge Explosión nos estudios Circo Perrotti. Desde a primeira escoita confirmamos que a aposta resultou atinada. Ás súas gravacións anteriores, colgadas no bandcamp, faltáballes ese lustre “analóxico” para o que o líder dos Doctor Explosión necesita apenas un par de días. Sempre e cando a banda veña coas cancións ben preparadas, deduzo.

Este mini álbum ofrece 6 cancións cos seus retrousos efectivos e unhas letras ben acaídas para cantar con desenfado e caer no baile máis básico e festeiro. Sexa a ritmo de surf, beat, rock and roll, garaxe, rhythm and blues … os Caamagno soan clásicos e aseguran a festa no directo. Nesta liña, “C”mon Baby, Unga-Unga” é pura incitación ao baile máis tolo: “porque bailar raro é o mellor/ven para aquí, chaval, ven a facer o mongol””. Enganchan coa raiba vital de“Fóra de Control”, a inspiración nas películas de serie-B en “Surfistas nazis” (“Na praia da Lanzada, a xente non se bagna…”), o escarnio dos que se coidan de máis co deporte (“Rantanplán”), as lerias sentimentais (“Mentireira”) ou esa tradición de ofrecer versións, neste caso a mítica “Poison Ivy” de Leiber e Stoller recreada como “Mala herba”: “Eu tigna unha nena que disque era da ETA / e tanto a quería que nunca a quixen denunciar”.

Para pecharen un círculo lóxico, editan en CD e vinilo co selo compostelán Lixo Urbano (Samesugas, Curtinaitis, The Homens…).

Pepe Cunha, 2-abril-2014

Facebook

3 hours ago

Ábrete de orellas
En galego, con independencia e citando fontes e referencias. Estas serían as premisas que sigo desde que me puxen ao outro lado dun micro. Non falo (ben) dalgo porque me paguen ou acrediten nin publico para monetizar. Non vivo disto. Dígoo pq xa mo preguntaron.Fdo: O director orelludo ... See MoreSee Less
Ver en Facebook