David Regueiro Trío feat. Alexandre Cavalière “Perfect Match!”

Marzo 27, 2023

O pasado agosto o reputado violinista belga Alexandre Cavalière achegouse uns días a Galiza para facer uns concertos co David Regueiro Trío. De paso gravarían un disco que aquí temos xa e cuxo título final resulta moi ben acaido, pois alude á impresión na que coincidiremos quen estivemos nalgún daqueles concertos. A gravación rememora dentro do posíbel o ‘encaixe perfecto’ deste catro instrumentistas a se fundir coa calor da inmediatez e a proximidade.

Só uns días de ensaio e actuacións chegaron para constatar a química e a compenetración destes talentos do jazz cíngaro ou manouche. Como amosaba no seu anterior “Areal” (2020), Regueiro non abandona o estilo no que gañou recoñecemento pero si que se deixa tocar por outras influencias, como na peza que xa lle coñeciamos e que benvida sexa outra vez: “Bolero desesperado”. Entre todas estas composicións propias atopamos influencias no musical dos swing, be bop, jazz, clásica … e na inspiración creativa a súa nai Elsa”, a escea de Lisboa (composta co violinista Ismael Cabaleiro) ou a Casa das Crechas, onde ten lugar unha vez ao mes unha jam session. E mesmo dedica a peza inicial “aos músicos que pasan o seu tempo a queixarse de compañeiros en troques de practicar”.

Lembras aqueles discos clásicos do século pasado que se gravaban só nuns días? Pois todo o sabor dun “ao vivo no estudio” ten este “Perfect Match!”, gravado, mesturado e masterizado un 14 de agosto. A máis clara invitación a celebrarmos o encontro, sen máis ataduras que o apuro do tempo, de dúas figuras referentes do jazz manouche. Gocemos desta proposta de equilibrio entre respectar a tradición e aplicarlle un ar anovador e fresco.

Pepe Cunha, 27-marzo-2023

escóitao no seu bandcamp

repertorio
Tone it down, turn it up!
The Seagull and the Frog
Elsa
Octopus Blues
Crechas Swing
Lisboa Rhythm
Bolero Desesperado

Alexandre Cavaliere: violín
David Regueiro: guitarra solista
Gonçalo Mendonça: guitarra rítmica
Juyma Estévez: contrabaixo

AXENDA

Facebook