Hai uns anos, Uxía e Sérgio Tannus musicaban poemas de Manuel María en “Andando a terra”, libro-CD-DVD editado pola Fundación Manuel María. Tamén adaptaron “O carro” e “Manuel do señorito”, no seu día cantados por Fuxan os Ventos e María Manuela. Agora chega o ano no que as Letras Galegas homenaxean o poeta chairego e resulta lóxico achegarse de novo a poemarios como “As Rúas do Vento Ceibe” (1979), “Os Soños na Gaiola” (1972), “Terra Chá” (1954), “Panxoliñas” (1992) e “Os Lonxes do Solpor” (2012). Nesta ocasión, a selección apunta cara un público máis infantil ou familiar e talvez non haxa compañeiros de viaxe mellor acaídos que Magín Blanco e o ilustrador Leandro Lamas, triunfadores con “A nena e o grilo nun barquiño” (Fol, 2013). Unha equipa de confianza presentada no atractivo formato de disco-libro que nesta ocasión publica a colección Sonárbore de Galaxia,
Resulta unha boa nova que dous músicos que se manexan tan ben na música infantil volvan traballar xuntos e máis cando deste reencontro resulta unha peza composta por eles a ocasión (“Todo me fala de ti”) e un par de recitados de Uxía (“Galiza” e “Amo esta terra”). A diferenza de “Andando na terra” (onde o brasilego Sérgio Tannus asumía case toda a parte musical), este álbum reparte os arranxos enntre os protagonistas principais, Guillerme Fernández e Santi Cribeiro, máis en semellanza con “A nena e o grilo”. No faltan as colaboracións de Pablo Vidal ao contrabaixo, os coros d”As Mosas, a percusión de Isaac Palacín … para completar un disco tranquilo, de corte sobre todo pop-folk-tradicional, con aires deste lado e de Latinoamérica. Lembrades esa corrente de cantautores musicando poetas ou uns Simon & Garfunkel? Sirvan coma referencia.
Apoiadas por unhas ilustracións tenras e coloridas, as cancións transmiten repouso, acougo, calma para falaren da natureza e a cidade: “O río – O mar”, “Poemiña para namorar unha rosa”, “A vaca”, “O lar”, “O meu cuarto – Teatro de guiñol”, “A roda – roda”, “Os traballos de todo o ano”, “O carro”, “A cidade”, “O cuco”, “Dorna”, “Panxoliña da neve” … Nos últimos anos, a música infantil e familiar en galego está a vivir un momento dourado, enchendo as actuacións ao vivo e con vendas máis que notabeis para os tempos que corren na industria musical. “Canta o cuco“ achega un poeta das pequenas grandes cousas a ese mundo no que teñen cadanseu espazo propio, pero conviven e se complementan, “María Fumaça”, “Rosalía pequeniña”, “A nena e o grilo”, “Tic Tac”, “Mamá Cabra”, “Estamos no verán”, “De aquí para alá”, “Alegría”, “Gatuxo” …
Pepe Cunha, 21-xaneiro-2016
