Batea “Tampoco somos los Rolling”

Febreiro 17, 2022

O debut de Batea atrapa antes polos ollos que polos ouvidos, tal é a orixinalidade da súa presentación física: unha lata de conserva coa súa portada e contraportada, como calquera disco de música, e o seu anel de apertura fácil. Todo co deseño gráfico do violinista da banda, no interior espéranos unha memoria USB con forma de mexillón que inclúe vídeos do grupo, libreto dixital e audios en formato WAV de alta calidade: doce temas ben acaidos para amantes do rock celta ou folk rock instrumental.

Esta proposta cociñouse durante o confinamento por antigos membros da banda de folk Virandeira, que fechara a súa traxectoria dunha década de concertos e discos. Ás gaitas, violíns ou frautas desa herdanza suman a enerxía da guitarra eléctrica e a base rítmica contundente, propias dunha banda de rock. A fórmula non é unha novidade, nin moito menos, e só hai que pensar naqueles anos 80-90 onde eran tan recoñecíbeis nomes como Gwendal, Oysterband, Shooglenifty, The Pogues, Wolkfstones, The Levellers …

Se concretamos, Batea ten unha dose máis heavy ou rock duro; é dicir, que tiran máis cara a uns Ñu ou Mago de Oz que a Celtas Cortos. Predominan a contundencia, a épica, o baile e a axitación sobre o repouso, que pode representar a lembranza a Virandeira Folk con “Trégola”. As outras versións son “Dark Reel” de Fraser Fifield e a tradicional irlandesa “Jimmy Ward’s Jig”, pero nun disco que cómpre dosificar engado ás mencionadas “Muiñeira comanche”, “Peñón”, “Duna” ou “Cachamuíña on Fire”. Non enganan no seu lema: “Folk, rock e lume!”

Pepe Cunha, 21-febreiro-22

1. Cachamuiña On Fire
2. Castlebar
3. Dark Reel
4. Duna
5. Epic Fantasy
6. Muiñeira Comanche
7. Rock Tradi
8. Trégola
9. Alén
10.Peñón
11. Jimmy Ward”s Jig
12. Prost!

AXENDA

Facebook

12 hours ago

Ábrete de orellas
Andrés Suárez & TANXUGUEIRAS "Remanso para morrer" nas "Sesiones Moraima 2" ... See MoreSee Less
Ver en Facebook