A compañía galega Zouma Records e a portuguesa Vachier & Associados alíanse para lanzaren o debut discográfico deste trío de folk acústico e instrumental. Disque “cando a torre comezou a esvaecer, un portugués co seu bandolín, un galego co seu bouzouki, e un irlandés co seu violín atopáronse no punto de encontro e non falaron. Mais tocaron música”. Estes tres músicos non son descoñecidos ou novatos, pois participan noutros proxectos máis ou menos vencellados co folk tradicional acústico: Luís Peixoto con Anxo Lorenzo, Kepa Junkera, Quadrilha, Galandum Galundaina ou Dazkarieh; Fernando Barroso con Riobó, Coanhadeira, Os Cempés; e Eoghaan Neff con Riverdance, The London Metropolitan Orchestra ou NeffBros. Agora preséntanse en trío para ofrecer o resultado dese “ponto de encontro” das súas orixes, experiencias e aprendizaxes musicais, bautizándoo con naturalidade na denominación inglesa. Barroso ao bouzouqui, Peixoto na mandolina e o cavaquinho, e Neff ao violín. Non procuren aquí grandes sorpresas ou mesma unha pequena revolución, pero si un feixe de composicións propias a cargo de bos coñecedores dos seus instrumentos. Trátase dun estupendo debut, cos seus momentos festeiros, como “Jumping Bits”, e a súa melancolía (“One Way Road Hotel Girl”…). E xa escoitamos falar ben dos seus concertos …
Pepe Cunha 19/11/2011
