Ábretedeorellas, finalista dos III Premios Martín Códax da Música

Abril 12, 2016

O pasado xoves déronse a coñecer os finalistas de todas as categorías dos III Premios Martín Códax da Música e o Ábrete de orellas optará a Mellor Espazo de Comunicación Musical canda o portal de Internet GZMúsica e o programa radiofónico da Radio Galega “Tres peixes voando”.

Agora @s soci@s de Músicos ao Vivo volven votar, esta vez entre os proxectos finalistas nas diferentes categorías, e o xoves 28 coñeceranse os vencedores na gala que terá lugar no Pazo da Cultura de Pontevedra.

Ábrete de orellas xorde no 1997 en Ferrol coma programa radiofónico. Desde entón, crece a carón do seu director Pepe Cunha, que espalla a súa faceta de comentarista musical noutros medios (Radio Kaos, Rádio FilispiM, Diario de Ferrol, Radio Fene, De troula, Xornal de Galicia, TVG … ).

No 2003 nace Ábrete de orellas.com coma portal especializado en música e concertos na Galiza que presta unha atención especial a artistas, salas e produtoras do país. As nosas axenda orelluda de concertos e crónicas procuran ser eclécticas e coidadas, co recoñecemento de máis de 15000 visitantes únicos ao ano e 2400 seareir@s en facebook.

Sen se restrinxir por etiquetas, apostamos por ser punto de encontro das diferentes propostas da música popular. Hai un espazo grande entre a erudición e os gustos maioritarios e aí se move Ábrete de orellas. Cos menos prexuízos posibeis aprendemos e compartimos, lanzamos suxestións, recomendamos concertos e invitamos a degustar produtos do país e de fóra.

En outubro de 2013 regresa ás ondas para gravar en Rádio FilispiM (Terra de Trasancos) un programa semanal dispoñible en podcast na internet e que na actualidade redifunden CUAC FM (A Coruña), A Kalimera (Compostela), Radio Roncudo (Corme), Radio Fedello (Ourense) e Onda Neria (Corcubión).

O pasado ano, a Concellaría de Cultura do Concello de Ferrol requiriu o noso asesoramento para un ciclo musical. Así, na primeira edición do ciclo “Na raíz” contamos con Caxade, Cuarteto Caramuxo, Davide Salvado, Fetén Fetén, Carmen París e Raúl Rodríguez.