A Quenlla, Sés e The Tetas Van encabezan o programa do XXVIII Festival da Poesia no Condado

Setembro 02, 2014

Nota:

Chega a primeira fim-de-semana de setembro e com ela o Festival da Poesia no Condado, que leva a Salvaterra de Minho um completo cartaz de teatro, cinema, fotografia, literatura e música, com um programa que encabeçam os clássicos A Quenlla, a reivindicativa Sés e as rockeiras The Tetas Van. Esta XXVIII ediçom do Festival da Poesia reivindica umha economia social que evite a exploraçom do meio e das pessoas para “Escrever nas margens” do capitalismo depredador un sistema mais humano.

Como cada ano, o Festival da Poesia reparte-se em duas jornadas, sexta-feira, 5, e sábado, 6 de setembro. Começa na tarde desta sexta-feira com a projeçom do documentário Pacios. As fotos da memoria, que apresenta o seu director, Manuel Darriba. Continua com a abertura das exposiçons colectivas ‘Elas som eu’ e ‘Matricas’, e culmina com a Noite nas Minas, na que atuam Blues do País. Esta actividade é a única de pagamento de todo o festival; o seu aforo é limitado e tem um preço reduzido (8€) para pessoas desempregadas (a entrada normal custa 10€). As entradas estám à venda em info@scdcondado.org ou no 646 959 587. A festa segue fóra das Minas com a actuaçom da Fanfarria Taquikardia e com a pinchada de Bigote Mix.

O groso de actividades chega no sábado. Começam de manhá com um passa-ruas e a montagem da feira de artesanato e colectivos, que este ano estará centrada nas finanzas éticas e na economia social. Ao meio dia haverá que escolher entre participar no Campionato de Bilharda ou na mesa redonda de projectos de economia social (bioconstruçom, horta e banca ética).

O grupo de teatro Tanxarina vai-se encarregar de animar a Festa Infantil desde as cinco da tarde, quando se retoma a actividade. Quando remate volverá o espaço para o audiovisual, com a projeçom das curtas Polas Bravas e umha selecçom das premiadas no Festival de Cans.

À noitinha, sobre as 21:00, o Leo i Arremecághona sairá ao cenário para apresentar o XVIII festival poético-musical, no que, como sempre, música e poesia irám alternando a sua apariçom. Depois da apresentaçom, repressentantes do colectivo ‘De volta para Loureda’ lerám o limiar da antologia poética do festival, escrito por Carlos Calvo, preso na cadeia de Topas, en Salamanca. Participam no recital poético Xabier Cordal, Ismael Ramos, Alicia Fernández, Berta Davila, Paula Carballeira, Teresa Moure, Concha Roussia, Xesús Rábade, Koki, e, desde Portugal, José Viale Moutinho e Marília Miranda. O apartado musical protagonizam-no A Quenlla, Fortuítos, Sés, The Tetas Van e Liska.

O programa completo, e algumha informaçom complementar, está na página web da SCD Condado:

Facebook