Cando estes catro músicos consolidados como instrumentistas noutras bandas decidiron probar con este proxecto non pensarían que a cousa ía ir tan rodada. Abraham Boba, Eduardo Baos, Luis Rodríguez e César Verdú andaban sobrados de táboas e a esa solvencia no directo foron sumando un feixe de cancións con marca propia e moitas delas himnos potenciais. Con só dous álbums xa se situaran por riba de media do indie patrio e non paraban de tocar, pero decidiron parar a coller folgos e crear un terceiro disco, “Vamos a volvernos locos”, que con tres meses no mercado non fai senón reforzar máis a súa traxectoria intensa.
Polo visto onte, semellan ser dos que cando acadan un status que o permite non escatiman no equipo técnico (tanto son coma luces) e con esta actitude regresaron á Coruña anos despois dunha visita a LeClub que recordaba Boba antes de atacar un daqueles primeiros himnos: “Ánimo, valiente”. Sen apenas pausas e cun público entregado repasaron con contundencia as dez novas cancións e recuperaron até oito da súa produción anterior. Foi desde a primeira destas, “La Ribera”, que boa parte do público pasou das butacas para escoitar en pé. Mellor moverse ante tal contundencia de luces e son.
“Gracias por lo que nos está pasando”, dicía o entregado frontman da banda, semellando que son conscientes e están a asimilalo ben. Non é habitual a coincidencia de calidade e popularidade e neste caso a banda si está a ter o recoñecemento: boas críticas dos seus traballos e teatros e salas cheas. O público que se citou no Colón é testemuña de que León Benavente están pletóricos e serán ben recibidos en calquera dos grandes festivais.
Pepe Cunha, 20-decembro-2019
repertorio:
Cuatro monos
Amo
Como la piedra que flota
La Ribera
Se mueve
Mano de santo
Estado provisional
Tu vida en directo
Ánimo, valiente
Volando alto
No hay miedo
Tipo D
California
Disparando a los caballos
Ayer salí
bises:
La canción del daño
Ser brigada
Gloria
