portada
       concertos
       novas
       discos
       crónicas
       artistas do país
       webs amigas

          actualizacións
22/05/2018
O Revenidas (17, 18 e 19 de agosto) incorpora ao seu cartel a Soziedad Alkoholika, The Real MCKenzies ou Balkan Bomba
12/05/2018
máis de vinte convidadas na xornada Mulleres e Música o sábado 19 de maio no Teatro Colón da Coruña
11/05/2018
Fernando Barroso e Margarida Mariño fan do Jofre no seu "Silence Lovers Club", 10-maio-2018
11/05/2018
mercedes peón "déixaas"
09/05/2018
Ribeiro Son de Viño presenta o cartel da súa V edición: O Sonoro Maxín, Esteban y Manuel, Marem Ladson, Bifannah, Pardo e Baiuca
09/05/2018
PortAmérica 2018 pecha o seu cartel con Xoel López, Jenny and the Mexicats e Pasajero
Mordem "Fragments to Dominate the Silence"


O talento e a calidade do proxecto co que a coñecimos merecía un novo paso, unha reencarnación na traxectoria musical da coruñesa Elba Fernández. Nos discos de Jane Joyd (gañador do Proyecto Demo de Radio 3 e o FIB) predominaban as cordas e un ar máis folque e norteamericano. En troques, e un par de anos despois, chega Mordem (nome tirado dun poema de Rosalía de Castro) bañado en electrónica, trip hop, ambient, dream pop .. e ollando máis a referentes nórdicos. Deixamos para medios "indies" a retahila de nomes para non nos distraer con comparacións e nos desviar do mérito interpretativo e a intensidade da voz e as letras de Elba.

Os dez títulos deste debut xa anticipan unha forte carga de solemnidade e pouco espazo para o banal ou lixeiro: "A Violent Place", "Underwater Breathtaking", "The Blindness", "Funeral", "The Beast" ... Nun exercicio de introspección, Elba fala de soidade, individualismo, destrución, fraxilidade do ser humano, morte, perda ... polo que necesita da complicidade d@ ouvinte. Dado ese paso, e sabendo que hai fendas pequenas para que entre a luz, apreciaremos a beleza melancólica e taciturna destas reflexións e as músicas que as envolven. Porque canda a voz e guitarra acústica de Elba Fernández, gozaremos tamén da produción e os detalles de David Unison (tamén nas programacións, beats, percusións), do piano de Xavi Font e das guitarras de Manuel Cabezalí. E outro nome de confianza na gravación e mesturas: Luca Petricca nos Estudios Reno (Madrid).

Estes "Fragments to Dominate the Silence" son unha proposta valente en tempos dun hedonismo ficticio, de inmediatez e fuxida covarde cara diante. Mordem propón pausa, atención e reflexión desde unha sonoridade elegante e contemporánea que nos proporciona abondos momentos de emoción. Para redondear o musical, unha primeira edición limitada co deseño e fotografía de Elba, sempre exquisita nos detalles do traballo artístico.

Pepe Cunha, 31-out-2017



Escoitar Abrete de Orellas nas ondas
vitaminasparaogalego
folmusica
musicosaovivo
Manifiesto la cultura no es un lujo
apoio o Ateneo